អេស្ប៉ាញ៖ ខ្សែការពារវ័យ ២០ឆ្នាំ Sergino Dest បានបង្ហើបពីគោលបំណងក្នុងការឈ្នះពានធំៗច្រើនបន្ថែមទៀតជាមួយក្លិប Barcelona ក្នុងរដូវកាលទី២របស់គេជាមួយក្លិបយក្សអេស្ប៉ាញនេះ។

Sergino Dest ដែលបានផ្ទេរមកកាន់ Barcelona ពីក្លិប Ajax កាលពីខែតុលា ឆ្នាំ២០២០នោះ បានរួមចំណែកជួយឱ្យក្លិបឈ្នះពាន Copa Del Rey រដូវកាលមុន ក្រោយយកឈ្នះក្លិប Athletic Bilbao នៅវគ្គផ្តាច់ព្រ័ត្រ។

Dest បាននិយាយក្នុងកិច្ចសម្ភាសន៍ជាមួយទូរទស្សន៍ Barcelona TV ថា៖ “ខ្ញុំចង់ឈ្នះពានច្រើនបន្ថែមទៀតជាមួយ Barcelona។ ខ្ញុំចង់ឈ្នះពាន La Liga និង Champions League ក្នុងរដូវកាលនេះ ហើយខ្ញុំចង់ទទួលបាននាទីលេងច្រើនបំផុតតាមដែលអាចទៅរួចក្នុងរដូវកាលថ្មី”។

គួរបញ្ជាក់ថា សម្រាប់រដូវកាលថ្មីនេះ Barcelona បានត្រៀមខ្លួនយ៉ាងល្អ ក្នុងការនាំយកកីឡាករសំខាន់ៗចូលរួមបន្ថែមដូចជា Sergio Aguero , Memphis Depay ក៏ដូចជាកំពុងចរចាកិច្ចសន្យាថ្មីជាមួយ Lionel Messi ដែលទើបតែផុតកំណត់កុងត្រា៕